Како си поминавме на доделувањето на сертификатите на генерацијата 2025/26

Сабота, повеќе од 200 средношколци и родители, еден нов технолошки кампус и многу причини за славење.

Во просториите на новиот кампус на NU HighSchool Academy и Brainster Next College, ја одбележавме генерацијата 2025/26 со доделување на сертификатите — но и со потсетување на сè што се случуваше на нивното патување низ академиите.

Се потсетивме на најубавите моменти, се смеевме, се дружевме и ги прославивме сите оние мали и големи чекори што ги направија нашите средношколци.

Затоа што НУ не е само место каде што учите нови вештини. Тоа е место каде што започнувате да се запознавате себеси, да ги откривате своите интереси и да го замислувате она што би можеле да го создадете во иднина.

Нашата цел отсекогаш била да ви помогнеме да го пронајдете својот пат — кон кариера, кон нови можности и, пред сè, кон себе.

Ова не е збогување

Иако една етапа завршува, ова не е крајот на приказната.

Сертификатот е потсетник на времето што го поминавте со нас, на знаењето што го стекнавте и на проектите што ги создадовте. Но, заедницата што ја изградивме продолжува да постои и по последниот час на академијата.

Секогаш ќе имате место во нашата заедница. За нови идеи, нови соработки, нови прашања и можности што допрва ќе ги откривате.

Бидејќи учењето не завршува со сертификатот. И ниту еден следен чекор не мора да го направите сами.

Луѓето што го направија денот посебен

Ниту еден ваков настан не е само една програма или една сцена. Тој е заеднички резултат на луѓето што придонесоа за секој негов момент.

Тино Костадиновски — благодарност што нè насмеа и нè мотивираше со своето присуство.
Петар Ниновски — благодарност за неговото обраќање и пораката до нашите средношколци.
Ања Макеска — за прозвањето на сите 114 средношколци на сцената и моментите што ќе ги паметиме.
Маркетинг тимот и NU тимот од средношколци — за сите фотографии, видеа и интервјуа со кои го зачувавме духот на денот.
Билјана Кумпанијоска — што се грижи за успехот на средношколците.

Секој од вас придонесе овој настан да биде повеќе од свечено доделување сертификати.

Новата генерација допрва започнува

Најголемата благодарност ја упатуваме до Halkbank, чија поддршка овозможува новата генерација средношколци да го започне своето патување на академиите на НУ.

Преку оваа соработка, отвораме повеќе можности за младите да учат, да експериментираат, да создаваат и да ги развиваат вештините што ќе им бидат потребни во иднина.

Затоа што секоја нова генерација носи свои прашања, интереси и идеи. А наша задача е да им дадеме простор да ги истражат.